காதலின் வானிலை எப்போதும் முழுநிலவுதான்
காதல் உணர்வு சொல்லில் அடங்காது !
காதலித்துப் பாருங்கள் வானில் பறக்கலாம்
காதலி கண்ணிலும் உள்ளத்திலும் இருப்பாள் !
இன்பரசம் எப்போதும் இருப்பாக இருக்கும்
இனிய நினைவுகள் அலைஅலையாய் வரும் !
காதல் மூன்று எழுத்து மோக மந்திரம்
கனிச்சாறாக இனித்திடும் இன்ப நினைவு !
சிறகுகள் இன்றி வானில் பறக்கலாம்
சிந்தனையில் மூழ்கி முத்து எடுக்கலாம் !
உண்மையான காதலை உடன் அங்கிகரியுங்கள்
உலகில் ஒழிய வேண்டும் ஆணவக் கொலைகள் !
காதலித்ததற்காக கொல்வதை உடன் நிறுத்துங்கள்
காதலை ஏற்கும் மனநிலை பெற்றிடுங்கள் !
பிள்ளைகள் காதலித்தால் பெற்றோர்கள் தற்கொலை
படித்துப் பார்த்தல் புரிந்திடும் மடமைகள் !
சாதி மதம் பார்ப்பதை உடன் நிறுத்துங்கள்
சந்தோசமாக பிள்ளைகளை வாழ்ந்திடவையுங்கள் !
காதலித்து மணமுடித்தால் வாழ்க்கை இனிக்கும்
காதலுக்குப் பச்சைக் கொடியைக் காட்டுங்கள் !
ஊர் என்ன நினைக்கும் என்பதை விட்டுவிட்டு
உங்கள் குழந்தைகள் மகிழ்ந்திட இணைத்திடுங்கள் !
ஆதாம் ஏவாள் காலத்தில் தொடங்கிய காதல்
அகிலம் உள்ளவரை தொடரும் காதல் உணருங்கள் !
காதலின் வானிலே சிறகடித்துப் பறக்கட்டும்
காதலை ரசித்து வாழ்ந்து மகிழுங்கள் !
நன்றி
கவிஞர் இரா.இரவி
![](https://tamildeepam.com/wp-content/uploads/2020/05/tamildeepam-flex-logo.png)