என் இனிய பகைவனுக்கு நன்றி ! கவிஞர் இரா .இரவி !
தீங்கு செய்வதாய் நினைத்து நீ செய்த
தீங்கு எனக்கு தீங்கே அல்ல !
புதிய அனுபவத்தைக் கற்றுத் தந்தது
புதிய மனிதர்களைச் சந்திக்க முடிந்தது !
திறமை உள்ளவன் எங்கும் வெல்வான்
திறமை உள்ளதால் வென்றேன் நான் !
முத்திரைப் பதித்தேன் கொண்ட கடமையில்
மேடைகள் கண்டேன் பரிசுகள் வென்றேன் !
சென்ற இடமெங்கும் சிறப்புகள் பெற்றேன்
சிந்தித்துப் பார்த்தேன் சிறிது மகிழ்ந்தேன் !
காணாத இடங்கள் கண்டு மகிழ்ந்தேன்
கண்டதை முகநூலில் பகிர்ந்து மகிழ்ந்தேன் !
தெரியாதவற்றைத் தெரிந்துக் கொண்டேன்
தெளிவான சிந்தனைக்கு நேரம் கண்டேன் !
வீழ்வேன் என்று நினைத்து தீங்கு செய்தாய்
வளமாக வாழ்வேன் என்று எண்ணவில்லை நீ!
படைப்புகள் பல படைத்து மகிழ்ந்தேன்
பலரும் என்னைப் பாராட்டி மகிழ்ந்தனர் !
நான் உனக்கு செய்த உதவிகளை
நீ நன்றி மறந்தாய் அது உன் இயல்பு !
நீ நெஞ்சில் குத்தி இருந்தால் மகிழ்ச்சி ஆனால்
நீ முதுகில் குத்தியதுதான் வடுவானது !
பதிலுக்கு உனக்கு தீங்கு செய்ய நீ அல்ல நான்
பதில் உனக்கு எனது வளர்ச்சியும் வெற்றியும் !
சூரியனின் சுடரை நீ சிறுபிள்ளைத்தனமாய்
சிறு கைகளால் மறைந்திட நினைத்தாய் !
தீங்கையும் நன்மையாக்கி மகிழ்ந்தேன்
தீங்கு செய்த என் இனிய பகைவனுக்கு நன்றி !
நன்றி கவிஞர் இரா இரவி
